လူတိုင်းလူတိုင်းကတော့ အချစ်ရေးမှာ ပျော်ရွှင်ချင်ကြတာချည်းပါပဲ ။ ရန်ဖြစ်ပြီးမှ ပြန်ချစ်တာက ဘယ်လိုပဲ ပိုကောင်းတယ်ဆိုဆို ရန်ဖြစ်တဲ့အချိန် ခံစားရတာကိုတော့ ဘယ်သူ့မှ ကြိုက်ကြမယ် မထင်ပါဘူး ။
အချစ်ရေးမှာ အဆင်ပြေဖို့ တစ်ယောက်တည်းကပဲ ကောင်းနေ၊ချစ်နေလို့ မရပါဘူး ။ နှစ်ဦးနှစ်ဖက် ချစ်ခင်နားလည်မှုရှိမှသာ အဆင်ပြေမှာပါ ။ သို့သော် နှစ်ယောက်စလုံးမှာဖြစ်စေ ၊ တစ်ယောက်ယောက်မှာဖြစ်စေ ဒီလိုအကျင့်ဆိုးတွေ ရှိနေမယ်ဆိုရင်တော့ စိတ်ညစ်စရာကောင်းတဲ့ အချစ်ရေးကြီး ဖြစ်နေမှာ အသေအချာပါပဲ ။
(၁) မကောင်းမြင် ၊ အပြစ်ပြောခြင်း
တစ်ယောက်အပေါ်တစ်ယောက် အကောင်းမမြင်ဘဲ အမြဲလို အပြစ်တင် ဝေဖန်နေခြင်းက အချစ်ရေးမှာ အဆင်မပြေနိုင်ပါဘူး ။ ဘယ်သူမဆို မကောင်းပြောတာထက် အကောင်းပြောတာကိုသာ လိုချင်ကြတာပါ ။ ပိုပြီး နှစ်ခြိုက်ကြတာပါ ။ အမှန်တကယ်မဟုတ်ဘူးဆိုတာကို သိရက်နဲ့တောင် ကိုယ့်ချစ်သူရဲ့ ချီးကျူးစကားကို မက်မောတတ်ကြတာပါ ။ (ဥပမာ ငါ့ချစ်သူက ဝတ်မှုန်ရွှေရည်ထက်တောင် လှတယ်ဆိုတာမျိုး ၊ ဒီနေ့အလှပြင်ထားတာ မျက်လုံးထဲကတောင် မထွက်ဘူး ဆိုတာမျိုး ၊ငါ့ကောင်လေးက တော်လိုက်တာ ဆိုတာ ၊ ကိုဒီနေ့အရမ်းမိုက်တယ် ဆိုတာမျိုးတွေပေါ့။)
(၂) မိမိသာမှန်တယ်ဟုထင်ခြင်း
ဒါလည်း တော်တော်ဆိုးတဲ့ အချက်ပါပဲ ။ ပြဿနာ (သို့) ကိစ္စတစ်ခုခု ဖြစ်တိုင်း မိမိရဲ့ လုပ်ရပ် ၊ အတွေးကသာ မှန်တယ်လို့ ထင်မြင်နေခြင်းဟာ တစ်ဖက်လူကို စိတ်ပျက်စေပါတယ် ။ ဘယ်အရာမဆို နှစ်ဦးနှစ်ဖက် အမြင်ဆိုတာ ရှိပါတယ် ။ကိုယ့်ဘက်ကနေကြည့်သလို သူ့ဘက်ကနေလည်း ပြန်ကြည့်တတ်ဖို့ လိုပါမယ် ။ ငါသာ သူ့နေရာမှာဆိုရင် ဆိုတဲ့ စိတ်ထားမျိုး ထားတတ်ဖို့လိုပါတယ်။
(၃) အတ္တကြီးခြင်း
အနည်းနှင့်အများ ကွာပေမယ့် လူတိုင်းမှာ အတ္တရှိပါတယ် ။ ကိုယ့်ဖို့သာ ကိုယ်သိခြင်း ၊ ကိုယ့်ပျော်ရွှင်မှုကိုသာ ဦးစားပေးပြီး တခြားတစ်ယောက်ရဲ့ စိတ်ခံစားမှုကို ထည့်မတွက်ခြင်းဟာ အတ္တကြီးခြင်းပါပဲ ။ နှစ်ယောက်ပေါင်းမှ အချစ်ရေးတစ်ခုဖြစ်လာတဲ့အတွက် တစ်ယောက်တည်း ခံစားချက်တွေ ထားလို့မရပါဘူး ။ မျှတွေးပေးတတ်ရပါမယ် ။ အတ္တကြီးချင်လျှင် တစ်ယောက်တည်းသာ နေပါ။
(၄) သစ္စာမရှိခြင်း
ဒီအကြောင်းအရာကတော့ ကိုယ်ကျင့်တရား ၊ သိက္ခာပိုင်းနှင့် ဆိုင်သွားပါပြီ ။ ဆန္ဒနဲ့ သိက္ခာကို မထိန်းနိင်တဲ့ သူတွေသာ သစ္စာမရှိကြတာပါ ။ သိက္ခာရှိတဲ့သူတိုင်း သစ္စာတရားကို စွဲမြဲစွာ လက်ကိုင်ထားတတ်ကြပါတယ် ။သစ္စာမရှိတဲ့ အချစ်ရေးကို ပိုင်ဆိုင်ထားရတယ်လို့ ခံစားရလျှင်တော့ အမြန်ဆုံးသာ ဖြတ်ချလိုက်ပါ ။
(၅) လိုအပ်သည်ထက်ထိန်းချုပ်လိုခြင်း
အများအားဖြင့်တော့ မိန်းကလေးတွေမှာ ဒီလိုစိတ်ပိုများပါတယ် ။ ကိုယ့်ချစ်သူ၊ အမျိုးသားအပေါ် လွှမ်းမိုးချင်တဲ့ စိတ်ကြောင့် နေရာတိုင်းမှာ ချုပ်ချယ်ချင်တဲ့စိတ်တွေ ရှိတတ်ပါတယ် ။ တစ်ယောက်နဲ့တစ်ယောက် သင့်တင့်သော ထိန်းချုပ်မှုမျိုး ရှိခြင်းက ကောင်းမွန်သော်လည်း လိုတာထက်ပိုတဲ့ ထိန်းချုပ်မှုကတော့ ထိန်းချုပ်ခံရသူအပေါ် မွန်းကျပ်စေပါတယ် ။ နားလည်မှု ပေးသင့်တဲ့နေရာတွေမှာ နားလည်မှု ပေးကိုပေးရပါမယ် ။
မိမိရဲ့အချစ်ရေးမှာ အဆင်ပြေပြီး ပျော်ရွှင်ချင်တယ်ဆိုရင်တော့အဲ့အချက်တွေကိုဖယ်ရှားဖို့လိုပါမယ် ။
Credit;Shwe Innlay
