ဒီနေ့ ပြောပြပေးချင်တာက ချစ်သူ ကောင်မလေးက ကောင်လေးဆီကနေ ဘာတွေ တကယ်လိုချင်တာလဲဆိုတဲ့ကိစ္စပါဘဲ။
ဒါကို ရည်းစားရှိတဲ့ ကောင်မလေးတွေ အကြွင်းမယ့် လက်ခံမယ်လို့လည်း ယုံကြည်ပါတယ်။ ကောင်လေးတွေ ဘက်က လည်း သိရှိနားလည်လိမ့်မယ်လို့ ယုံပါတယ်။ ဒီနည်းနဲ့ ပျော်ရွှင်တဲ့အချစ်ကမ္ဘာလေးတွေ တိုးပွားလာစေဖို့ ရည်ရွယ်ပါတယ်။
စိတ်နှစ်ကိုယ်နှစ် အချစ်စစ်
အမျိုးသမီးတွေ တမ်းတတဲ့ အချစ်ကတော့ သူ့ကိုလည်း ကိုယ်က တကယ်ချစ်တယ်၊ သူကလည်း ကိုယ့်ကို တကယ် ချစ်တယ်။ အဲဒီလို နှစ်နှစ်ကာကာ အချစ်မျိုးကိုသာ လိုချင်ကြပါတယ်။ အပျော်ရှာတာလား၊ နောက်တစ်ယောက်နဲ့ ဖောက် ပြန်နေသလားဆိုတာ အမျိုးသမီးတွေ အမြဲစိတ်ပူနေရတဲ့ အရာပါဘဲ။
အံ့သြ၀မ်းသာစေမယ့် လက်ဆောင်
ထင်မှတ်မထားတဲ့ အချိန်မျိုးမှာ လက်ဆောင်ပစ္စည်းတစ်ခုခု ပေးတာမျိုးကို အမျိုးသမီးတွေ မျှော်လင့်ကြပါတယ်။ ငွေကြေးအရ တန်ဖိုးရှိခြင်း မရှိခြင်းဆိုတာထက် သူတို့စိတ်ထဲက တန်ဖိုးထားမှုအပေါ်မှာသာ မူတည်ပါတယ်။ ဒီတော့ အမျိုးသားတွေ လက်ဆောင်ပေးဖို့ ပြင်ထားပါ။
ဟာသနဲ့ တင်ဆက်ခြင်း
ဟာသဉာဏ်ရှိတဲ့ ချစ်သူမျိုးကို ပိုင်ဆိုင်ထားရတဲ့ အမျိုးသမီးတစ်ယောက်ဟာ အမြဲပျော်ရွှင်ရပါတယ်။ သူက ၀မ်းနည်းစရာ တွေ သူမအတွက် ဘယ်တော့မှ ဖန်တီးမှာ မဟုတ်သလို၊ ၀မ်းနည်းမှုတွေ တစ်ဖက်က ၀င်လာတယ်ဆိုရင်တောင် သူရဲ့ ဟာသအမြင်နဲ့ သူမကို ပြေပျောက်စေမှာပါ။
အမှန်တကယ် ဂရုစိုက်မှု
ချစ်သူနှစ်ယောက်ကြားမှာ အရေးတကြီးအလိုအပ်ဆုံးကတော့ တကယ် ကြင်ကြင်နာနာ ဂရုစိုက်မှုပဲ ဖြစ်ပါတယ်။ တစ်ချို့က ဦးစားမပေးသင့်တာတွေ ဦးစားပေးရင်း ချစ်သူကို ချောင်ထိုးထားတတ်ကြပါတယ်။ ဒီလိုဖြစ်ရပ်မျိုးမှာ အမျိုးသမီးတွေက ရိုက်တာထက် နာကြင်တတ်ပါတယ်။
အပြုသဘောဆောင်ခြင်း
မည်သူမဆို ကျိုးကြောင်းဆင်ခြင်နိုင်တဲ့ ပညာဉာဏ်နဲ့ပြည့်စုံရင် အရာရာကို အမှန်အတိုင်း ဆင်ခြင်သုံးသပ်ပြီး အပြုသ ဘောဆောင်တဲ့ အမြင်မျိုးကိုသာ မြင်လေ့ရှိပါတယ်။ အမျိုးသားတစ်ယောက်မှာလည်း အဲဒီလိုအမြင်မျိုးလိုအပ်ပြီး၊ အရာရာတိုင်း အမျိုးသမီးတစ်ယောက်နဲ့အပြိုင် စိတ်လိုက်ကောက်နေတဲ့သူမျိုးကျတော့ ကီးသိပ်မကိုက်ပါဘူး။
ဖေးမ၀န်းရံခြင်း
အမျိုးသမီးတွေမှာ အဖော်အဖြစ် အလိုအပ်ဆုံးအချိန်က သူတို့ ကျရှုံးချိန်၊ သူတို့ တစ်စုံတစ်ရာကို ပြင်းပြင်းရှရှ ခံစားရချိန်၊ နာကြင်တဲ့အချိန်၊ ပူဆွေးတဲ့အချိန်၊ ငိုကြွေးတဲ့အချိန်ပါဘဲ။ ဒီလိုအချိန်မျိုးမှာ သူမအနားကို သူ့ကို အရှိစေချင်ဆုံးဆိုတာ ငြင်းနိုင်မှာ မဟုတ်ပါဘူး။
ကျားကုတ်ကျားခဲ ကြိုးစားမှု
ဘယ်ကောင်မလေးပဲဖြစ်ဖြစ် ကိုယ့်ကို ပိုးပန်းတဲ့အမျိုးသားကို သူမရဲ့အချစ်ကိုရဖို့ ဘယ်လောက် ခက်ခက်ခဲခဲ ကြိုးစားသလဲ ဆိုတာ မြင်ချင်ကြပါတယ်။ တစ်ချို့က မိဘတွေ အိပ်နေချိန်မှာ ၀ရံတာက ကျော်တက်ပြီး ပန်းစည်းလက်ဆောင်ပေးတာမျိုး ရှိသလို၊ တစ်ချို့ကကျတော့ မျက်နှာချင်းဆိုင်အိမ်က ကောင်မလေးကိုတောင် ပြူတင်းပေါက်ဖွင့်ပြီး ငေးပြတတ်တဲ့ အကျင့်မရှိကြပါဘူး။
