ချစ်သူနှစ်ဦး ပေါင်းဖက်ပြီးသာယာချမ်းမြေ့တဲ့မိသားစုဖြစ်လာဖို့ဆိုရင်နှစ်ဖက်မိဘအသိုင်းအဝိုင်းရဲ့ကောင်းချီးသြဘာပေးမှုရရှိဖို့လည်းလိုအပ်ပါသေးတယ်။
အခုတခါမှာတော့ Wedding Guide ရဲ့ သတို့သား သတို့သမီးလောင်းတွေ အတွက်ကိုယ့်ချစ်သူရဲ့မိခင်က ကိုယ့်ကိုကြည်ဖြူလက်ခံအောင်၊ချစ်ခင်လာအောင်အသုံးဝင်မယ့်နည်းလမ်းလေးတွေကို ဖော်ပြပေးလိုက်ပါတယ်။
အမှတ်တရလက်ဆောင်ပေးခြင်း
ဘယ်သူမဆို လိုချင်လို့မဟုတ်ဘဲ ကိုယ့်ကိုအလေးထားပေးတဲ့လက်ဆောင်လေးတွေကိုတော့သဘောကျတတ်ကြပါတယ်။ သင့်အနေနဲ့ ကိုယ့်ချစ်သူရဲ့မိခင်အတွက်လက်ဆောင်ဒါမှမဟုတ် သူမ စားတတ်တဲ့အစားအသောက်မျိုးပြင်ဆင်ပေးမယ်ဆိုရင် သင့်အတွက်ရလဒ်ကောင်းတွေရလာမှာပါ။ အမေများနေ့၊ ကိုယ့်ယောက္ခမလောင်းရဲ့မွေးနေ့၊ နှစ်သစ်အခါသမယတွေမှာ အမှတ်တရ လက်ဆောင်ပြင် ဆင်ပေးမယ်ဆိုရင် သင့်ချစ်သူအပေါ်ထားတဲ့ သင့်ရဲ့ချစ်ခြင်းမေတ္တာကိုခန့်မှန်းနိုင်မှာပါ။
စကားစမြည်ပြောခြင်းကို ရှောင်ပါ
သူ့မိခင်နဲ့တွေ့တဲ့အခါ နေကောင်းလား၊ တွေ့ရတာဝမ်းသာပါတယ်စသဖြင့် အပေါ်ယံ အာလာပသလ္လာပပြောခြင်းထက် သူမရဲ့ လက်တလောအခြေအနေတစ်ခုခုကိုဦးတည်မိတ်ဆက်တာမျိုး ပြုလုပ်သင့်ပါတယ်။ ဥပမာ သင်တို့တွေ့တဲ့အခါ သူမဖျားနေတာမျိုးဆိုရင် သက်သာရဲ့လား၊ ဘာစားချင်လဲစသဖြင့်၊ သူမဈေးဝယ်တာနဲ့ကြုံရင် ဈေးဝယ်ရတာအဆင်ပြေရဲ့လား စသဖြင့်ပြောသင့်ပါတယ်။ ဒီလိုပြောဆိုခြင်းအားဖြင့် သူ့မိခင်နဲ့ သင်နဲ့ကြားကဆက်ဆံရေးကိုပိုပြီးနွေးထွေးစေပါတယ်။ ရင်းနှီးမှုပိုရှိစေပါတယ်။
သင့်ချစ်သူရဲ့ ကလေးဘဝအကြောင်းအလေးထားမေးမြန်းပါ
မိခင်တွေရဲ့ မျက်လုံးထဲမှာ သားသမီးတွေဟာအမြဲတမ်းကလေးတစ်ယောက်လိုရှိနေတတ်ပါတယ်။ ငယ်ဘဝတွေကို မမောမပန်းပြန်ပြောဖို့လည် းဝန်မလေးတတ် ကြပါဘူး။ သင့်အနေနဲ့သူ့မိခင်နဲ့ ရင်းနှီးမှုတည်ဆောက်ဖို့ဆိုရင်တော့ ဒီအချက်က အသုံးဝင်ပါလိမ့်မယ်။
အကြံဉာဏ်ပေးပါ
တခါတလေ ဆိုးသွမ်းတဲ့သား၊ သမီးတွေကိုတောင် မျက်နှာမလွှဲနိုင်ကြတာမိခင်တွေပါပဲ။ အနာဂတ်၊ ဘဝ ရပ်တည်ရေးတွေနဲ့ ပတ်သက်ပြီး စိုးရိမ်နေတဲ့ ကိုယ့်ချစ်သူရဲ့ မိခင်ကို အကြံဉာဏ်ပေးတာမျိုးပြုလုပ်သင့်သလို သူမရဲ့အလှအပ၊ ကျန်းမာရေး၊ လူမှုပေါင်းသင်းဆက်ဆံရေးအဆင်မပြေမှုတွေကို အကြံပြုကူညီပေးခြင်းဖြင့် သင်တို့နှစ်ယောက်ရဲ့ဆက်ဆံရေး၊ သင်နဲ့သူ့မိခင်ရဲ့ဆက်ဆံရေးကို အကောင်းဆုံးတည်ဆောက်နိုင်မှာပါ။
Source: Aunty May
