မင်္ဂလာဆောင်ပွဲလေး ကျင်းပမယ်လို့ တွေးလိုက်တာနဲ့ အရင်ဆုံး ပြင်ဆင်ရမှာပါက ငွေကြေးပါပဲ။ ကုန်ကျစရိတ်တွေ ပြင်ဆင်ပြီးမှ
နှစ်ဖက်မိဘတွေနဲ့ စေ့စပ်တောင်းရမ်း ညှိနှိုင်းပြီး မင်္ဂလာရက်မြတ် သတ်မှတ်လို့ မင်္ဂလာပွဲလေး ကျင်းပကြမှာလေ။ ဒီတော့ မင်္ဂလာပွဲစီစဉ်နေရင်း မင်္ဂလာဆောင်စရိတ် မပူပန်ရအောင် ကြိုတင်ပြင်ဆင်ထားရမှာပါ။ ဘယ်လိုပြင်ဆင်ရမလဲဆိုတာ ပြောပြပေးပါ့မယ်နော်။
သတ်မှတ်ပါ
မင်္ဂလာဆောင်ဖို့အတွက် အရင်ဆုံးကုန်ကျစရိတ် ဘယ်လောက်ကုန်ကျခံမလဲဆိုတာသတ်မှတ်လိုက်ပါ။ သတ်မှတ်ထားမှလည်းပွဲကို စီစဉ်နိုင်မှာလေနော်။ အရင်ဆုံးမင်္ဂလာပွဲအတွက် ကုန်ကျစရိတ်ကို သိန်း(၂၀) ၊ သိန်း(၃၀) အစရှိသလို သတ်မှတ်ပါ။ သတ်မှတ်ထားတဲ့ ပမာဏက မင်္ဂလာပွဲသီးသန့်အတွက်ပဲ ဖြစ်ပါစေနော်။ တချို့က သိန်း(၅၀) လောက် စုထားမယ်၊ အဲဒီအထဲကမှ နေဖို့အိမ်အတွက် ဖယ်ရတာမျိုး လုပ်တာမျိုး ရှိပါတယ်။ အဲဒီလို မလုပ်ဘဲ မင်္ဂလာပွဲအတွက်ပဲ သီးသန့်သတ်မှတ်ပါ။
စိတ်ရှည်ပါ
စုံတွဲလေးတို့အနေနဲ့ မင်္ဂလာစရိတ် ကြိုတင်ပြင်ဆင်တဲ့အခါမှာ စိတ်ရှည်ဖို့ လိုပါတယ်။ မင်္ဂလာစရိတ်အတွက် ကုန်ကျစရိတ် ကြိုတင်စုဆောင်းတဲ့အခါမှာ နှစ်ယောက်စလုံး စိတ်ရှည်ပါ။ ပိုက်ဆံ စုတဲ့အခါမှာ မင်္ဂလာစရိတ် ဖယ်ပြီးမှ သုံးပါ။ မင်္ဂလာပွဲလေး အလျင်အမြန် လုပ်လိုက်ဖို့ထက် မင်္ဂလာစရိတ်ပြည့်ဖို့ကို အာရုံစိုက်ပါ။ နှစ်နဲ့ချီပြီး စုကြမယ်ဆိုရင်တောင် စိတ်ရှည်ပါနော်။
စာရင်းမှတ်ပါ
စုံတွဲလေးတို့ အရင်ဆုံး မင်္ဂလာပွဲအတွက် ကုန်ကျမယ့် စရိတ်တွေကို စာရင်း ချမှတ်ပါ။ ဥပမာ မင်္ဂလာဝတ်စုံ (၄) သိန်း၊ ပန်းအပြင်အဆင်(၄) သိန်း အစရှိသလိုမျိုးပေါ့။ အဲဒီလိုလေး မှတ်ထားပြီး အဲဒီကုန်ကျစရိတ်ထက် လုံးဝ အပိုမသုံးမိအောင် ကန့်သတ်ထားပါ။ စာရင်းထဲမှာလည်း ဝတ်စုံဖိုးတော့ ပြည့်ပြီ၊ အပြင်အဆင်စရိတ်လည်း စုလို့ ပြည့်ပြီ အစရှိသလို စာရင်းမှတ်ပါ။ ဒါဆိုရင် အပိုကုန်ကျတာလည်း မရှိတော့သလို စုရတာလည်း အားရှိလာမှာပါ။
မလိုအပ်တဲ့ ကုန်ကျစရိတ်တွေ
မင်္ဂလာပွဲမှာ ကုန်ကျစရိတ် လျှော့ချနိုင်မယ့် အချက်တွေလည်း ရှိပါတယ်။ မင်္ဂလာစရိတ်အတွက် ပူပန်နေရတာမျိုး မဖြစ်ရလေအောင် မင်္ဂလာပွဲ စီစဉ်တဲ့အခါမှာ ကုန်ကျစရိတ် လျှော့ချနိုင်မယ့် အချက်တွေကိုလည်း တွေးပါ။ ကိုယ်သတ်မှတ်ထားတဲ့ ပမာဏအတွင်း မဝင်တဲ့ ကုန်ကျစရိတ်တွေကို လျှော့ချလိုက်ပါ။ ဒါဆိုရင် အဆင်ပြေမှာပါနော်။
မင်္ဂလာပွဲစရိတ်အတွက် ကြိုတင်ပြင်ဆင်လို့ရမယ့် အချက်လေးတွေ မျှဝေပေးလိုက်ပါတယ်နော်။ စုံတွဲလေးတို့ သေချာလေး ဆောင်ရွက်မယ်ဆိုရင် စိတ်ပူတာတွေလည်း လျော့သွားမှာပါ။
Credit : Marry
