အိမ်ထောင်ပြုတယ်ဆိုတာက လက်ထပ်စာချုပ်မှာ လက်မှတ်ထိုးလိုက်တာနဲ့ ပြီးသွားတာမဟုတ်ပါဘူး။ ပြီးတော့ ဘယ်အရွယ်မှာ အိမ်ထောင်ြ့ပုရမလဲဆိုတဲ့ မေးခွန်းကလည်း အဖြေခက်တဲ့ ပုစ္ဆာလိုပါပဲ။
ပြီးတော့ အိမ်ထောင်ပြုတယ်ဆိုတာက အသက်အရွယ်အပေါ်မူတည်တယ်ဆိုပေမယ့် တိုက်ရိုက်အချိုးကျတာ မဟုတ်ပြန်ပါဘူး။ ဒါပေမယ့် အခုဖော်ပြတဲ့အချက်တွေနဲ့ ကိုက်ညီမယ်ဆိုရင်တော့ အိမ်ထောင်ပြုဖို့ အဆင်သင့်ဖြစ်နေပါပြီ။
(၁) တကယ်ချစ်တာလား
လက်ထပ်မယ့်အိမ်ထောင်ဖက်ကို ကိုယ်တကယ်ချစ်တာမှ ဟုတ်ရဲ့လား ဆန်းစစ်လိုက်ပါဦး။ ကိုယ့်အိမ်ထောင်ဖက်က တစ်ဘဝတစ်ခုလုံး ပုံအပ်ရလောက်အောင် ထိုက်တန်မှသာ လက်ထပ်ဖို့အရေး စဉ်းစားပါ။ ကိုယ်တကယ်မချစ်ဘဲနဲ့တော့ လက်မထပ်ပါနဲ့။ ပြီးတော့ အချစ်ဆိုတာနဲ့ စွဲလမ်းမှုဆိုတဲ့ ဝေါဟာရနှစ်ခုကြားကို နားလည်အောင် အရင်လုပ်ပါ။
(၂) ပုံမှန်ဝင်ငွေရှိပြီလား
ပုံမှန်ဝင်ငွေမရှိသေးဘဲနဲ့ အိမ်ထောင်ပြုဖို့ မစဉ်းစားပါနဲ့ဦး။ လစဉ်ဝင်ငွေရှိနေတဲ့ အိမ်ထောင်သည်တွေတောင် စီးပွားရေးမပြေလည်ကြတာ ဒုနဲ့ဒေးပဲလေ။ အိမ်ထောင်ပြုဖို့ စဉ်းစားတော့မယ်ဆိုရင်တော့ အလုပ်တစ်ခုရှိဖို့ လိုလာပြီနော်။ အဲဒီတော့ ပုံမှန်ဝင်ငွေရှိအောင်လုပ်။ ကိုယ့်ဝင်ငွေက လင်မယားနှစ်ယောက်လုံးကို ဖူလုံအောင် ထားနိုင်မှသာ စဉ်းစားပါ။
(၃) နားလည်မှုရှိပြီလား
ရည်းစားဘဝမှာတောင် တစ်ယောက်ကိုတစ်ယောက် နားမလည်သေးဘူးဆိုရင် အိမ်ထောင်ပြုဖို့ မဆုံးဖြတ်ပါနဲ့ဦး။ လူတိုင်းမှာ ခြောက်ပစ်ကင်း သဲလဲစင်ဆိုတာ မရှိနိုင်ပါဘူး။ ကိုယ့်အိမ်ထောင်ဖက်ရဲ့ အတိတ်က အဖြစ်ဆိုးတွေ၊ နောင်ဖြစ်လာမယ့် ပြဿနာတွေကို နားလည်ပေးနိုင်လို့လား။ အချစ်စိတ်မွှန်နေတဲ့အချိန်မှာတော့ နားလည်ပေးနိုင်ပါတယ်လို့ ဖြေကြမှာပဲ။ ဒါပေမယ့် အချိန်ယူပြီး စဉ်းစားပါဦး။ ကိုယ့်ဘက်ကနေ သေချာမပြင်ဆင်ထားရင်တော့ ချစ်ခရီးလမ်း (၆) လမပြည့်ခင်မှာပဲ အချစ်ဆိုတာကြီး နောက်ဖေးပေါက်က ထွက်သွားတဲ့အချိန်မှာ ဒုက္ခတွေက မဖိတ်ခေါ်ဘဲ ဝင်လာတတ်ပါတယ်။
(၄) မိဘက သဘောတူပြီလား
အိမ်ထောင်ပြုမယ်ဆိုရင် နှစ်ဖက်မိဘတွေအကုန်လုံး အဆင်ပြေဖို့ အရေးကြီးပါတယ်။ ကိုယ်က အိမ်မှာ အကြီးဆုံးဖြစ်တာကြောင့် ကိုယ့်ဝင်ငွေကို မိဘနှစ်ပါးက မှီခိုနေရတယ်၊ ပြီးတော့ ကိုယ်မရှိရင် မောင်နှမအငယ်တွေ ထိခိုက်သွားနိုင်တယ်ဆိုရင် အချိန်ခဏတော့ စောင့်လိုက်ပါဦး။ ကိုယ်မရှိရင်တောင် ကိုယ့်နေရာမှာ လက်လွှဲနိုင်တဲ့လူမျိုးရှိမှသာ အိမ်ထောင်ရေးကိစ္စစဉ်းစားတာက ပိုကောင်းပါတယ်။ ဒါမှသာ သားရှင်၊ သမီးရှင်ဘက်က ကြည်ကြည်ဖြူဖြူဖြစ်နေမှာပါ။
(၅) အစီအစဉ်ဆွဲပြီးပြီလား
အိမ်ထောင်ပြုတော့မယ်ဆိုရင်တော့ စီးပွားရေး၊ လူမှုရေး၊ ကျန်းမာရေးကအစ သားသမီးရေးအဆုံး အကုန်လုံးကို မျှတအောင် ခန့်ခွဲတတ်ပြီလား။ အိမ်ထောင်ရေးတစ်ခု သာယာခိုင်မြဲအောင်ရော ထိန်းသိမ်းနိုင်ပြီလား။ အိမ်ထောင်ကျပြီးရင် ဘာတွေလုပ်မယ်၊ ဘယ်လိုစီမံမယ်၊ ဘယ်လိုထိန်းသိမ်းမယ်ဆိုတာကအစ သားသားမီးမီးလေးတွေ မွေးလာရင် ဘယ်လိုတွေလေ့ကျင့်ပျိုးထောင်ပေးမယ်အဆုံး စနစ်တကျအစီအစဉ်ဆွဲထားမှသာ သာယာတဲ့အိမ်ထောင်တစ်ခု ရရှိမယ်လို့ ဆိုချင်ပါတယ်။
Credit;Akhayar
