အိမ်ထောင်တစ်ခုပြုဖို့ဆိုတာလွယ်တဲ့အလုပ်တော့မဟုတ်ပါဘူး။ အစစအရာရာစေ့စပ်သေချာအောင် ဂရုစိုက်ဆောင်ရွက်နိုင်မှ
သာယာပျော်ရွှင်တဲ့အိမ်ထောင်ရေးကိုရရှိနိုင်မှာပါ။ အိမ်ထောင်ပြုပြီးလို့ အိမ်ထောင်သည်ဘ၀ရောက်ပြီဆိုတာနဲ့ တစ်ကိုယ်ရေတစ်ကာယ ဘ၀တုန်းကလို သုံးချင်တိုင်းသုံး ဖြုန်းချင်တိုင်းဖြုန်းလို့မရတော့ပါဘူး။ အနည်းဆုံးတော့ ကိုယ့်မှာငဲ့ညှာရမယ့် အိမ်ထောင်ဖက်တစ်ဦးရှိနေပါပြီ။ ဒီတော့ ရလာတဲ့ဝင်ငွေကို ဘယ်လိုစိစစ်မလဲ။ ထွက်ငွေကိုလည်း နည်းနိုင်သမျှနည်းအောင် ဘယ်လိုအသုံးပြုမလဲ။
အရင်ဦးဆုံး သင်တို့ဇနီးမောင်နှံနှစ်ဦးရဲ့ စုစုပေါင်းဝင်ငွေကို တွက်ချက်ပါ။ ပြီးရင် ၀င်ငွေကို ၃ ပုံအညီအမျှခွဲပါ။ ပထမတစ်ပုံကိုတော့ အိမ်စရိတ်အတွက်အသုံးပြုပါ။ ဒုတိယတစ်ပုံကို အလှူအတန်းပြုလုပ်ဖို့ဖယ်ထားပါ။ တတိယတစ်ပုံကိုတော့ စုဆောင်းပါ။ ပထမတစ်ပုံကို အိမ်စရိတ်အတွက် အသုံးပြုတဲ့နေရာမှာလည်း တတ်နိုင်သလောက် အိမ်စရိတ်ကိုအကုန်အကျနည်းအောင် လျှော့ချသင့်ပါတယ်။ နှစ်ယောက်တည်းစားဖို့အတွက် ဟင်းတွေ ၄ ၅ ခွက်ချက်မယ့်အစား ၂ ခွက်လောက်နဲ့ သင့်တင့်လောက်ငှအောင် စားသောက်လို့ရပါတယ်။ နောက်ပြီး အိမ်ထောင်သည်ရယ်လို့ဖြစ်လာပြီဆိုရင် ကိုယ်တစ်ဦးတည်းလိုအပ်တာထက် နှစ်ဦးနှစ်ယောက်စလုံးလိုအပ်တဲ့ပစ္စည်းကိုဦးစားပေးဝယ်ပါ။ ဒီအချက်တွေကလည်း အိမ်စရိတ်ကိုသိသိသာသာ လျော့ကျစေမယ့်အချက်တွေပါပဲ။
ဒုတိယတစ်ပုံအနေနဲ့ကတော့ မြန်မာစကားပုံတစ်ခုလိုပါပဲ “မရှိလို့မလှူ၊ မလှူလို့မရှိ” တဲ့။ အော် .. ငါ့မှာတော့ပိုက်ဆံမရှိလို့မလှူတော့ပါဘူးဆိုပြီး အလှူအတန်းမလုပ်ဘဲနေရင် ဘယ်တော့မှပိုက်ဆံကရှိလာမှာမဟုတ်ပါဘူး။ လှူတန်းတဲ့နေရာမှာလည်း နည်းတယ်များတယ် မဟုတ်ဘဲ ကိုယ်လှူချင်တဲ့စိတ်စေတနာကသာ အဓိကပါ။ စိတ်ထားတတ်မယ်ဆိုရင် ညောင်စေ့လောက်လှူပေမယ့်ညောင်ပင်ကြီးလောက် ရပါတယ်။
တတိယတစ်ပုံကို စုဆောင်းတဲ့နေရာမှာလည်း သင်တို့နှစ်ယောက်ရဲ့ရှေ့ရေးကို မျှော်ကြည့်ဖို့လိုပါတယ်။ ရှေ့ဆက်သွားရမယ့်ဘ၀ခရီးလမ်းမှာ ဘာတွေဖြစ်လာမလဲဆိုတာ ဘယ်သူမှမသိနိုင်ပါဘူး။ အဲ့တော့ရှေ့ရေးအတွက် ကြိုတင်ပြင်ဆင်တဲ့အနေနဲ့ ပိုက်ဆံစုဆောင်းတတ်တဲ့အလေ့အထကို မွေးမြုဖို့လိုပါတယ်။ သားသား မီးမီး လေးတွေရလာတဲ့အခါကျရင်လည်းသူတို့ကိုကောင်းကောင်းမွန်မွန်ကြီးပြင်းနိုင်အောင် ပြုစုပျိုးထောင်ဖို့၊ ကြီးပြင်းလာတဲ့အခါမှာလည်း ကျောင်းထားဖို့ အစရှိတဲ့မိဘရဲ့တာဝန်ဝတ္တရားတွေကို ကျေပွန်အောင်ဆောင်ရွက်နိုင်ဖို့အတွက် စုဆောင်းထားတဲ့ငွေကြေးတွေက အထောက်အကူပြုပါလိမ့်မယ်။
အားလုံးပဲ သာယာပျော်ရွှင်တဲ့အိမ်ထောင်ရေးဘ၀လေးကို ပိုင်ဆိုင်နိုင်ကြပါစေ။
Read More: သင့်ချစ်သူမှာဒီလိုအချက်တွေရှိနေပြီဆိုရင် လက်မလွှတ်သင့်တော့ပါဘူး
Author – Nyi Min Khant
